Let's Talk Forum


Relationships

Posted by Xyzbc

7-8 sal tk kisi ke sath relation( pati ptni jaise ek dusre ko smjhte huye...behtr understanding ke sath) me rhne ke baad koi ldki kisi aor se shadi krke khus rhe skti h apne husband ke sath???? Kya wo apne purane pyar ko bhul skti h??? Kya married life aacha ho skta h....???

Answer
moderator love-matters
0

Puttar,
Bhooli to nahi hogi wo - agar itna lamba saath tha. Par beta yeh ho sakta hai ki woh aage badh chuki hai. Ho sakta hai usko bhi yaad aata ho par woh apne present main reh kar apni marriage ko ek mauka dena chahti ho - woh chahti ho ki woh ek nayi zindagi ki shuruaat kare. Muje banhi pata tum dono ka breakup kaise hua tha, kya wajah thi - par main yeh janti hun ki breakup se ubharna mushkil hota hai, khaskar tab jab rishta lambe samay ke baad tootta hai aur aapne is saath ke bahut sare sapne dekhe hote hai. Isse ubharane ke liye sabse zaruri hai - apne apko samay dijiye. Kisi bhi neeji rishtey ke tootne par jo takleef hoti hai wo asahaniye hoti hai aur ham kamzoor mehsus karte hai. Aur rishta khatam hone ki takleef shayad tujhko ye bhi mehsus kara rahi ho ki tujh mein hi koi kami hai. Ye sarey sawal tere mann mein aayenge aur tujhe in sab cheezon ka mukabla karna padega. Samay aur sahansheelta hi tujhe is dard se ubharegi. Tu nayi shuruwat tab tak nahi kar payenge jab tak aap apne aap ko ye nahi samjha payenge ki ye rishta bas yahi tak ka thaa.

Jeevan iske aagey bhi hai - tujhe apne app ko ek nayi shuruwaat ke liye taiyar karna padega aur isme samay lagega. Koi jald baazi mat karna aur apne emotions ko settle hone ka samay dena. Tu apne aap ko ye samjhane ki koshish kar ki tu atmavishwas ke saath ek naye sire se ek naye rishtey ki shuruwat kar sakta hai. Aage ka rastaa tujhe apne aap dikhne lagega.

Aur haan, breakup ka dard tab aur mehsus hota hai jab hum pori tarah apne apko purani yaadon mein duba kar rakhtey hai. Ek nayi shuruwat ke liye ye zaruri hai ki tu wo sab kuch karein jo apko acha lagta hai. Doston se milna, sports khelna, apni pasand ke gaane sunana, movies dekhna ya phir kuch naya seekhna. Apne aap se poochiye ki kya cheezein karne se apka dhyan kahi aur batega. Agar neeji dost hai tere to usne apni mann ki baat share kar.

Beta rishtey to hote hi hai paichida lekin is daur se ubharne ke baad tum samajh paoge ki rishtey aur breakups bhi humein bahut kuch sikha kar jaate hain, kai baar bahut acchi cheezein bhi.. Duniya bahut rangeen hai aur kya pata tum aagey aur kitne romanchak logon se milo. Beta ji, mukka do apne aap ko aur aagey badho. Aur haan breakup to ek bada mudda hai aur aise kitne diljale hain jinhone nujhse ye sawal baar baar poocha hai,. Tu akela nahi hai beta. Padh yahan - jo tujhe bata rahi ho wo maine kitne aur logon ko bataya hai: https://lovematters.in/hi/love-and-relationships/breaking-up/getting-ove...
Teri Aunty hai yahan tera dukh baatne ke liye aur main chahti hun ki tu aagey badhe aur apne app ko pyaar ke is khel mein aur mauka de. Chal muskura de abhi.

Auntyji
0

Mam hmrara breakup hua hi nhi...... Achank se uska rista aya aor..uski shadi fix ho gyi .....kya usko apne pyar ke liye... Apne ghr me baat nhi krna chahiye tha.....?? Kya 8 saal ke riste ko todkr wo kisi ke sath khush rh legi???? Kya usko kv guilt feel nhi hoga... Kya wo sari khwahishen aor kis aor ke sath jee payegi jo usne mere sath dekhe the??? Mai sch me us ldki se ek dm niswarth prem kiya hun....... Bina kisi shrt ke...... Kya usko meri life ke sath aise khelne ka hk h??? Kya ye smaj aor privaar kis ki life se bda ho skta h??? Kya behtr option milte hi apne purane pyar ko chhor ke kisi aor ke life ko jeena theek h???? Kya kisi ma papa ko apne bchhcho ki khusi ke siway kuch aor v chahiye hota h????? Mai sch me us ldki se bhut pyar kiya hun.... Mujhe ab nhi lgta h mai future me kisi aor ke sath jud paunga.....

moderator love-matters
0

oh puttar, main samaj sakti hun fir to tumhara frustrate hona ya itna zyada bura lagna bilkul jayaz hai. Usne jo kiya shayad uske apne karan honge. waise to bahut difficult hai ki agar koi kissi se 7-8 saal se attached ho aur uske baad aur waisa he attachement kissi aur se kar sake. I am sure uski bhi koi majboori rahi hogi. Usne yeh kadam jis bhi wajah se utahya ab reality to yeh hai ki uski khushi shayad kissi aur ke saath ke hai, aapke saath nai. Yeh accept karna bahut he mushkil hota hai. Aapko aisa lag raha hoga ki shayad aap kabhi bhi usko bhool na sakein - kyunki woh aapki life ka ek hissa ban chuki thi - woh bhi bahut lambe time tak.
Lekin beta - sachha pyar to wahi hai na jismein hum apni khushi bhool ke doosre person ki khushi ko dekhein - aur uske decision ki respect karein. Waise to abhi aapko usko bhool pata bada hee mushkil lag raha hoga - lekin pata hai - samay bahut bada marham hai - yeh dheere dheere sab kuch sehne layak to bana he deta hai. Aapko abhi meri baton pe bilkul yakeen nahi ho raha hoga - lag raha hoga ki aap ke saath bahit galat hua aur aapki life main ab kuch acha hone ki jagah nahi hai - but kismat pe yakeen karo - ho sakta hai ki aapke liye kuch bahut he badiya wait kar raha ho. Dheere dheere sab theek hoga - uski yadon ko apne main me ek achi memory ki tarah sambhal ke rakhein. Woh. yadein apko smile dene ke liye honi chahiyein. Na ki dhukhi karne ke liye. Woh kehte hai na - Woh afsaana jise anjaam tak laana na ho mumkin, Usse ek khoobsurat mod de kar chhodna achha ... yeh bhi padh lo waise - https://lovematters.in/hi/love-and-relationships/can-i-find-true-love-again

Auntyji