Let's Talk Forum


Sex

Posted by Avatar

Aunty ji mujhe HIV/AIDS ko lekar ek bahut bada confusion hai Jiska answer mujhe aajtak kisi bhi website par nahi Mila , aur mere contact mein Jo dost wagaira hai unko to HIV/AIDS ko lekar pata hi kuch nahi hai, aur woh idhar udhar ka bakwaas karke doubt ko badhaane mein aag mein petrol daalne ka kaam karte Hain.

Aunty ji HIV/AIDS ko lekar mere multiple sawaal Hain so please dhyaan se padhkar mere ek ek sawaal ka answer imaandaari se dijiyega.
1) Maine yeh padha hai ke AIDS virus infected Mard/Aurat se Bina condom pehankar sex karne se failta hai. Ab Mera sawaal yeh hai ke filhaal to main married nahi hu par jab Meri Shaadi hogi, Suppose ke Meri patni HIV/AIDS infected nahi hai aur na hi main infected hu to Kya Bina condom pehankar baar baar sex karne se AIDS ho sakta hai kya? Baar baar sex karne se Mera Matlab Life time. Agar main Bina condom ke apni patni ke saath Taa-umar sex karoon to AIDS to nahi hoga? I know aapko Mera sawaal ajeeb lagega par Yeh main isliye pooch Raha hu kyunki mujhe doubt yeh hai ke agar couple infected nahi hai to Kya baar baar Bina condom ke sex karne se virus Dono ke shareer mein apne aap paida ho sakta hai kya? Ya yeh sirf ek hi case mein failtaa hai jab Infected person se Bina condom ke kiya jaaye.

2) Ab isi se juda Mera ek aur bada sawaal yeh hai ke agar yeh tab nahi failtaa hai jab pati aur patni Dono ki body mein infection na ho, bhale hi woh jitni Marzi baar Bina condom ke sex karein to Kya main yeh samjhoon ke yeh khud ke shareer se paida hone waala virus nahi Balki doosre ke shareer se apni body mein enter hone waala virus hai? Aur agar yeh virus non-infected couple ke shareer se baar baar Bina condom ke sex karne se apne aap Ijaad nahi hota to fir yeh virus duniya mein develop kaise hua kyunki yeh to communicable hai Jo ek shareer se doosre shareer mein enter hota hai to fir woh pehla insaan jiske shareer mein yeh virus paaya Gaya tha it means uske apne shareer se Ijaad nahi hua tha to fir woh uski body mein tayaar kaise hua? Kya yeh virus artificially designed virus that Jo ek baar human body mein enter hone ke baad us aadmi ke banaaye Huey duniya ke har insaan mein asurakshit yon sambandhon ki chain se failtaa Gaya?

3) Yeh Jo Maine vistaar mein saari baat ki, isey Karne ke peechey Mera maksad yeh jaanne ka hai Kya yeh Virus Human Body mein apne aap Ijaad hua tha ya yeh Ijaad kiya Gaya tha? Kyunki Ijaad hone aur Ijaad karne mein fark hai. Kyunki agar Ijaad kiya Gaya to iska Matlab yeh Insaan ke apne shareer se banne waali cheez nahi thi aur agar yeh apne aap Ijaad hua to iska Matlab yeh hua ke yeh non-infected couple ke khud ke shareer se tab bhi paida ho sakta hai jab woh infected tha hi nahi.

Ghoom firke sawaal Mera wahin aakar khadaa hua ke Kya yeh virus us case mein couple ke shareer mein ho sakta hai jab woh baar baar Bina condom pehankar sex karein jabki woh Dono infected nahi they????

Itna lamba chauda sawaal poochne ke liye aur aapka dimaag ghoomaane ke liye Main vinamrata se haath jodkar aapse Maafi chahta hu par Aunty ji Jo sawaal Maine detail mein poocha hai yeh mere liye aapse poochna bahut hi zaroori tha kyunki mujhe nahi pata ke AIDS aakhir Kya cheez hai aur yeh kis tarah fail sakta hai? Please mere sawaal ko dhyaan se padhkar answer dijiyega. Thankyou, God bless you

Answer
0

Avatar puttar, 1. Tere pehle sawal ka jawab hai - nahi. Bina condom ke agar ek he partner ke saath baar baar sex kia jaye - aur woh partner bhi kahin aur sex na kare aur tum bhi kissi aur partner ke saath sex na karo - sirf tum dono he aapas main sex karo - koi multiple partners ke saath nahi - to aise HIV/Aids nahi hota. Lekin haan bina condom ya bina kissi birth control ke pregnancy zaroor ho sakti hai. Bahut se married log apas main saari umar ek he partner ke saath sex karte hain - jahan pe female partner ya to copper T use karti hai ya fir birth control pills jaise mala-d wagera use karti hai - pregnancy ko rokne ke liye - to aise main woh loh bina condom ke sex kar lete hain - isse HIV nahi hota. Aur haan virus apne aap bhi paida nahi hota. Yeh sankraman se hota hai.  

2. HIV virus 1920 main pehli baar insaan ke shareer main tab aaya jab Democratic Republic of Congo ( Africa) ke logon ne wahan ke aise chimpanzees ka meat khaya, jinh me Simian Immunodeficiency Virus (SIV) naam ka ek virus tha - jo ki HIV ke jaisa he hota hai. SIV monkeys/chimps/apes ke immune system ko attach karta hai aur un mein rehta hai. To beta yeh chimpanzee se insaan main aaya pehli baar, aisa research se pata chala hai. Ek insaan se doosre insaan main jaa ke yeh virus failta he raha. ya hunting ke dauraan us virus wale chimp/monkey ka blood insaan ke blood se mix ho gaya cuts wagera ki wahaj se aur monkeys/chimps se insaan main yeh virus aa gaya.

3. Jee nahi - yeh apne aap insaan ke shareer main ijad nahi hua aur na he apne aap paida hua. Iska origin africa ke monkeys main hua maana jaata hai, jisse yeh insaano main aaya.

Beta maafi maangne ki zaroorat nahi nahi. Hum log tumhare sab sawalon ke jawab dene ke liye he baithe hain yahan. I hope tumhe madad mili hogi. https://lovematters.in/hi/safe-sex/stdsstis/hiv

Auntyji
0

Thankyou so much Aunty ji...Aapne mere saare doubts clear Kar diye, you're doing a very great job, God bless you